މިހާރު ކުރަމުންދާ ވިއްސާރައާ ގުޅިގެން ގޭގެއަށް ފެން ވަނުން ކޮންޓްރޯލް ކުރުމަށް ވެލި ބަސްތާ ޖެހުމާއި އެހީތެރިކަން ބޭނުންވާ ރައްޔިތުންނަށް އެހީތެރިވެދިނުމަށް ސްޓެލްކޯގެ މުވައްޒަފުން މާލެ ސިޓީގައި ހަރަކާތެރިވުމުން ސްޓެލްކޯގެ އެމްޑީ، ހުސައިން ފަހުމީ މުވައްޒަފުންނަށް ޝުކުރު އަދާކުރައްވައިފިއެވެ.

އެމްޑީ ވިދާޅުވީ ސްޓެލްކޯ އިން ޚިދުމަތްދޭ އެހެނިހެން ރަށްރަށުގެ މުވައްޒަފުން މިވަގުތުވަނީ ރަށު ފެންވަރުގައި ރައްޔިތުންނަށް އެހީތެރިވުމަށްޓަކައި ތައްޔާރީހާލަތަކަށް ގެނެވިފައިވާ ކަމަށެވެ. 

މީގެއިތުރުން ރައްޔިތުންނަށް ދިމާވާ މިފަދަ ކަންކަމުގައި އެހީތެރިކަން ފޯރުކޮށްދިނުމަށް ސްޓެލްކޯގެ މުވައްޒަފުން އަބަދުވެސް އުފަލާއިއެކު އެންމެ ކުރީ ސަފުގައި ތިބޭނެކަމުގެ ޔަގީންކަން ވެސް ވަނީ އަރުވާފައެވެ.

Advertisement

އެމްޑީ ވަނީ ގައުމީ ރޫހުގައި މުވައްޒަފުން ކުރައްވަމުން މިގެންދަވާ މަސައްކަތްތަކަށް ފަޚުރުވެރިކަމާއިއެކު ޝުކުރު ދަންނަވާފައެވެ. އަދި ރައްޔިތުންނަށް ޚިދުމަތް ކުރުމުގެ މަތިވެރި ރޫހު ސްޓެލްކޯގެ މުވައްޒަފުންގެ ގައިގައި އަށަގަނެފައިހުރީ ޒަމާނުއްސުރެ ވަރުބަލިކަމެއް، ފޫހިކަމެއްނެތި އިޚުލާސްތެރިކަމާއެކު ރައްޔިތުންނަށް ދެއްވަމުން ގެންދަވާ ޚިދުމަތުގެ ސަބަބުން ކަމުގައި ވެސް ވިދާޅުވިއެވެ.

އެމްޑީ ވިދާޅުވީ ރައްޔިތުންނަށް ދިމާވާ މިފަދަ ކަންކަމުގައި ސްޓެލްކޯގެ މުވައްޒަފުން އަބަދު ވެސް ދައްކަވަމުން ގެންދަވަނީ ތަޢުރީފު ޙައްޤު، ހިތްވަރާއި ޖޯޝުން ފުރިގެންވާ ނަމޫނާއެއް ކަމުގައެވެ.