ރާއްޖޭގައި އުފެދުނު އެންމެ މޮޅު އެއް ފުޓުބޯޅަ ރެފްރީ މައްލާ ޅަތުއްތުގެ ޖަނާޒާ ބާއްވައިފިއެވެ.

މައްލާ ޅަތުއްތު އަވަހާރަވީ އިންޑިއާގެ ޓްރިވެންޑްރަމްގެ ހޮސްޕިޓަލެއްގައި އައިސީޔޫގައި ފަރުވާދެމުންދަނިކޮށް މިދިޔަ ބުރާސްފަތި ދުވަހުގެ މެންދުރުގެ ވަގުތެއްގައެވެ. މައްލާ ޅަތުއްތުގެ ހަށިގަނޑު ރާއްޖެ ގެނެސް، މޫނު ދެއްކުން ކުރިއަށްގެންދިޔައީ މިއަދު މެންދުރުފަހު 14:30 ގައި އިސްލާމީ މަރުކަޒުގައެވެ.

މައްލާ ޅަތުއްތުގެ މައްޗަށް ކަށުނަމާދުކޮށްފައިވަނީ މަޣުރިބު ނަމާދަށްފަހު، އިސްލާމީ މަރުކަޒުގައެވެ. މައްލާގެ މައްޗަށް އިމާމްވެ ކަށުނަމާދު ކުރެއްވީ އިސްލާމީ މަރުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފެވެ. ކަށުނަމާދަށްފަހު މައްލާ ޅަތުއްތު ފަސްދާނުލާފައިވަނީ ގަލޮޅު ސަހަރާގައެވެ.

Advertisement

މައްލާ ޅަތުއްތަކީ ރާއްޖޭގެ ކުޅިވަރުގެ ދާއިރާގައި ފާހަގަކޮށްލެވޭ ގިނަ ޚިދުމަތްތަކެއްކޮށްދެއްވި ޝަޚުޞިއްޔަތެކެވެ. އޭނާއަކީ ފީފާ ބެޖު ޙާސިލްކުރެއްވި ފުރަތަމަ ދިވެހި ރެފްރީއެވެ. އޭނާވަނީ 1969 އިން 1995 އާ ހަމައަށް ރެފްރީކަން ކުރައްވާފައެވެ. ދިވެހި ކުޅިވަރަށް ޚިދުމަތްކުރުމުގެ ރޮނގުން ޝަރަފުވެރިކަމުގެ ޤައުމީ އިނާމު، 2021 ވަނަ އަހަރު މައްލާއަށް ލިބިވަޑައިގެންފައިވެއެވެ.