އިނގިރޭސި ޕްރިމިއާ ލީގުގެ އާ ސީޒަނުގައި ލިވަޕޫލުން ކުޅުނު ފުރަތަމަ މެޗުގައި އިޕްސިވިޗް ޓައުންގެ މައްޗަށް 2-0 އިން ކުރި ހޯދައިފި އެވެ.

އިޕްސިވިޗްގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މި ހާފުގައި ކައުންޓަ އެޓޭކުތަކުގައި ލިވަޕޫލްގެ ގޯލަށް ނުރައްކާ ކުރަން އިޕްސިވިޗުން މަސައްކަތްކޮށްފައިވެ އެވެ.

މި މެޗުގައި ފެނިގެންދިޔަ ފުރަތަމަ ގޯލު ލިވަޕޫލަށް މެޗުގެ 60 ވަނަ މިނެޓްގައި ކާމިޔާބުކޮށްދިނީ ޑިއޯގޯ ޖޯޓާ އެވެ. މި ގޯލު ޖޯޓާ ކާމިޔާބު ކުރީ މުހައްމަދު ސަލާ ތަނަވަސްކޮށްދިން ފުރުސަތަކުން އިޕްސިވިޗްގެ އޭރިއާ ތެރޭ ހުހަށް ހުރެ ފޮނުވާލި ހަމަލާއަކުންނެވެ.

Advertisement

ފުރަތަމަ ގޯލު ކާމިޔާބު ކުރިތާ ފަސް މިނެޓް ފަހުން ސަލާ ވަނީ ލިވަޕޫލްގެ ދެވަނަ ގޯލު ކާމިޔާބުކޮށްދީފަ އެވެ. މިއީ ލިވަޕޫލްގެ މިޑްފީލްޑަރު ޑޮމިނިކް ސޮބޮސްލާއި ދިން ޕާހަކުން ސަލާ ކާމިޔާބުކުރި ގޯލެއް ކަމަށްވާއިރު މި ގޯލަށްފަހު ވެސް ލިވަޕޫލްގެ ލީޑު އިތުރަށް ފުޅާކޮށްލަން ސަލާ އަދި ކޯނާ ބްރޭޑްލީ އަށް ރަނގަޅު ފުރުސަތެއް ލިބި ބޭކާރުވެފައިވެ އެވެ.

މި މެޗަކީ ލިވަޕޫލްގެ އާ ކޯޗު އާން ސްލޮޓްގެ އިރުޝާދުގެ ދަށުން އެޓީމުން ކުޅުނު ރަސްމީ ފުރަތަމަ މެޗެވެ. ލިވަޕޫލްގެ ކޯޗުކަމާ ސްލޮޓް ހަވާލުވީ 9 އަހަރަށްފަހު އެ ކްލަބުގެ ކޯޗުކަމުގެ މަގާމު ޔާގަން ކްލޮޕް ދޫކޮށްލުމާ ގުޅިގެންނެވެ.

ލީގުގައި ލިވަޕޫލް ދެން ބައްދަލުކުރާނީ އަމިއްލަ ދަނޑުގައި ބްރެންޓްފޯޑްއާ އެވެ.