ކުރިއަށް އޮތް ސެޕްޓެމްބަރ މަހު އައިފޯން 16 ދައްކައިލަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.

އާންމުކޮށް އެޕަލް އިން އައިފޯންގެ އާ މޮޑެލްތައް ދައްކައިލަނީ ކޮންމެ އަހަރެއްގެ ވެސް ސެޕްޓެމްބަރު މަހުގެ ތެރޭގަ އެވެ. އެގޮތުން ކުރިއަަށް އޮތް މޮޑެލް ކަމަށްވާ އައިފޯން 16 ދައްކައިލަން ބާއްވާ ހާއްސަ އިވެންޓް އޮންނާނީ މި މަހުގެ 10 ގައި ކަމަށް ޓެކް ޚަބަރުތަައް ގެނެސްދޭ މީޑިއާތަކުން ބުނެ އެވެ.

ނަމަވެސް މިކަމާ ގުޅޭ ގޮތުން އެޕަލް އިން ރަސްމީކޮށް އަދި ވަކި އެއްޗެއް ބުނެފައެއް ނުވެ އެވެ.

Advertisement

މީޑިއާތަކުން ބުނީ އައިފޯން 16 ގެ ހަތަރު މޮޑެލްއެއް ނެރޭނެ ކަމަށެވެ. އެއީ އައިފޯން 16، އައިފޯން 16 ޕްރޯ، އައިފޯން 16 ޕްލަސް އަދި އައިފޯން 16 ޕްރޯ މެކްސް އެވެ. ކުލަތަކަށް ބަލާ އިރު އައިފޯން ޕްރޯ އާއި އައިފޯން ޕްރޯ މެކްސް ލިބޭނެ ކުލަތަކަކީ ސްޕޭސް ބްލެކް، ވައިޓް، ގްރޭ އަދި ރޯސް އެވެ. އަދި އައިފޯން 16 އާއި އައިފޯން 16 ޕްލަސްގެ ކުލަތަކުގެ ތެރޭގައި ހިމެނޭނީ ބްލެކް، ގްރީން، ޕިންކް، ބްލޫ، ވައިޓް އަދި ޔެލޯ އެވެ.

ރިޕޯޓްތައް ބުނާ ގޮތުން އައިފޯން 16 ސީރީޒްގެ ފޯނުތަކުގައި އާޓިފިޝަލް އިންޓެލިޖެންސް (އޭއައި) ގެ ވަރަށް މުހިއްމު ގިނަ ފީޗާތަކެއް ވެސް އެކުލެވޭނެ އެވެ. އަދި މި މޮޑެލްތަކުގައި ކެމެރާތަކުގައި ވެސް ވަރަށް ހާއްސަ ގިނަ ފީޗާތަކެއް އެކުލެވޭނެ އެވެ.

އައިފޯންގެ ކޮންމެ ސީރީޒެއްގައި ވެސް އެޕަލް އިން ޓެކްނޮލިޖީގެ ގޮތުން އާ ކަންތައްތަކެއް ހިމަނާ އިރު، ގިނަ ބަޔަކު ގަބޫލުކުރަނީ އައިފޯން 16 ސީރީޒަކީ ވެސް ވަރަށް ހާއްސަ ގިނަ ފީޗާތަކެއް އެކުލެވޭނެ ޑިވައިސްއަކަށް ވާނެ ކަމަށެވެ. ނަމަވެސް ފޯނުތައް ރަސްމީކޮށް ނެރުމުގެ ކުރިން އެޕަލް އިން އަކީ އުފެއްދުންތަކާ ގުޅޭ އެއްވެސް ތަފުސީލީ މައުލޫމާތެއް ހާމަނުކުރާ ކުންފުންޏަކަށްވާތީ، އައިފޯން 16 އަކީ ޓެކްނޮލޮޖީގެ ގޮތުން ކިހާ ބޮޑު ބަދަލުތަކެއް ގެނުވައި ދޭނެ އެއްޗެއް ކަމެއް މުޅިއަކުން ސާފެއް ނުވެ އެވެ.

އެކަމަކު ކަށަވަރުވާ ކަމަކީ އައިިފޯން 16 އިން އިންގިލާބީ ޒަމާނީ ބަދަލުތަކެއް ގެނެސްދޭނެ އެެއްޗަކަށް ވާނެ ކަމަށެވެ. އެހެންވެ އައިފޯނަށް ލޯބިކުރާ މީހުން ތިބީ އާ ބަދަލުތަކަކީ ކޮބައިތީ ބަލާލަން ކެތްމަދުވެފަ އެވެ.