އިނގިރޭސި ޕްރިމިއާ ލީގުގައި ޗެލްސީ 2-0 އިން ބަލިކޮށް އެންމެފަހުގެ ޗެމްޕިއަނުން ކަމަށްވާ މެންޗެސްޓާ ސިޓީން ފެށުން ރަނގަޅުކޮށްފި އެވެ.

ޕްރިމިއާ ލީގުގެ ޗެމްޕިއަންކަން ފާއިތުވި ހަތަރު ސީޒަނުގައި ވެސް ހޯދި ސިޓީން މި މެޗުގައި ރަނގަޅު ކުޅުމެއް ދެއްކިއިރު، އެޓީމުގެ ފުރަތަމަ ގޯލު މެޗުގެ 18 ވަނަ މިނެޓްގައި ކާމިޔާބުކޮށްދިނީ އާލިން ހާލަންޑް އެވެ. ހާލަންޑް މި ގޯލު ކާމިޔާބު ކުރީ ޗެލްސީގެ އޭރިއާގެ ތެރެއިން ދެ ޑިފެންޑަރުން ކައިރިން ނައްޓާލުމަށްފަހު ފޮނުވާލި ހަމަލާއަކުންނެވެ.

މިއީ ހާލަންޑް ސިޓީ އަށް ކުޅެދިން 100 ވަނަ މެޗުގައި ކާމިޔާބު ކުރި 91 ވަނަ ގޯލެވެ.

Advertisement

ހާލަންޑްގެ ގޯލަށްފަހު ލީޑު ފުޅާކޮށްލަން ސިޓީގެ ޖެރެމީ ޑޮކޫ އަށް ރަނގަޅު ފުރުސަތެއް ލިބުނު ނަމަވެސް އޭނާ ފޮނުވާލި ހަމަލާ ޗެލްސީގެ ގޯލްކީޕަރު ރޮބަޓް ސަންޗޭޒް ވަނީ ދިފާއުކޮށްފަ އެވެ. ފުރަތަމަ ހާފް ނިމުމުގެ ކުރިން ޗެލްސީގެ ނިކޮލަސް ޖެކްސަން ގޯލެއް ކާމިޔާބު ކުރި ނަމަވެސް ވީއޭއާރް ބެލުމަށްފަހު ރެފްރީ ވަނީ ޖެކްސަން އޮފްސައިޑް ކަމަށް ނިންމާފަ އެވެ.

ސިޓީގެ ގޯލަށް މާބޮޑު ނުރައްކަލެއް ޗެލްސީ އަށް މި މެޗުގައި ކުރެވިފައި ނުވާއިރު، ސިޓީގެ ދެވަނަ ގޯލު މެޗުގެ 84 ވަނަ މިނެޓްގައި ކާމިޔާބުކޮށްދިނީ ޗެލްސީ އަށް ކުރިން ކުޅުނު މަޓެއޯ ކޮވަސިޗް އެވެ. ކޮވަސިޗް މި ގޯލު ކާމިޔާބު ކުރީ ޗެލްސީގެ އޭރިއާގެ ބޭރުގައި ހުރެ ފޮނުވާލި ހަމަލާއަކުންނެވެ.

ލީގުގައި ސިޓީން ދެން ބައްދަލުކުރާނީ އަމިއްލަ ދަނޑުގައި އިޕްސިވިޗް ޓައުންއާ އެވެ. ޗެލްސީ ނިކުންނާނީ ރަށުން ބޭރުގައި ވުލްވްސްއާ ދެކޮޅަށެވެ.