މަޝްހޫރު ވިޔަފާރިވެރިޔާ އަދި ރައްޔިތުން މަޖިލީހުގެ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަން ސިޔާމު) ގެ ހަރަދުގައި ބ. ކަމަދޫގެ ހުރިހާ ރައްޔިތުންނަށް ހިލޭ ބޭސްފަރުވާ ކުރެވޭނެ ގޮތް ހަމަޖައްސައި ދީފި އެވެ.

މިކަމާ ގުޅޭ ގޮތުން އެ ރަށު ކައުންސިލުން ބުނީ އެފަދަ ފުރުސަތެއް ސިޔާމްގެ ފަރާތުން ހަމަޖެހިގެން ދިޔައީ ކައުންސިލާ އެކީ ކުރެވުނު މަޝްވަރާތަކަކަށް ފަހު ކަމަށެވެ. އެހެންވެ މިހާރު އެކަން ރައްޔިތުންނަށް އަންގާފައިވާ ކަމަށް ވެސް ކަމަދޫ ކައުންސިލުން ބުންޏެވެ.

ކައުންސިލުން ނެރުނު އިއުލާނެއްގައި ބުނީ ސަން ސިޔާމް ކެއާގެ ދަށުން ރާއްޖެ އާއި ރާއްޖެ އިން ބޭރުން ކަމަދޫ ރައްޔިތުންނަށް ހިލޭ ބޭސްފަރުވާކޮށް ދެވޭނެ ކަމަށެވެ. އެގޮތުން މާލީ އެހީތެރިކަން ބޭނުންވާ މީހުންނަށް ކަނޑައެޅޭ އުސޫލެއްގެ ދަށުން އެ އެހީތެރިކަން ދޭން ނިންމާފައިވާތީ ވަނީ އެހީއަށް ބޭނުންވާ މީހުން އެކަން ކައުންސިލަށް އެންގުމަށް އެދިފައިވެ އެވެ.

Advertisement

ކަމަދު އަކީ 560 އެއްހާ މީހުންގެ އަބާދީއެއް އޮންނަ ރަށެކެވެ.

ގިނަ ބައެއްގެ ސަމާލު ކަމަށް މި ފަހުން އެ ރަށް އައީ މިދިޔަ ބޮޑު އީދު ތެރޭގައި ރަށުގައި ބޭއްވި ކުޅިވަރުތަކުގެ ތެރެއިން، ރީތި އަންހެން ކުދިންތަކެއްގެ ނެށުންތަކެއްގެ ވާހަކަތަކާ އެކީގަ އެވެ.