ވ. އާރަށުގެ މައްސަލައިގައި ކުރީގެ ރައީސް ޔާމީނަށް ކުރާ ދައުވާގެ ޝަރީއަތް އަލުން ކުރިއަށްގެންދާއިރު އަޑުއެހުންތައް ލައިވްކޮށް ކުރިއަށް ގެންދިއުމަށް ނިންމައިފިއެވެ.

އެމްއެމްޕީއާރްސީ ބޮޑު ހިޔާނާތުގެ ތެރޭގައި ހިމެނޭ ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ޔާމީންގެ މައްޗަށް ސާބިތުވެ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް އަދި ޔޫސުފް ނައީމްގެ މައްޗަށް ރިޝްވަތު ދިންކަމުގެ ކުށް ސާބިތުވެ 3 އަހަރާއި 2 މަހާއި 12 ދުވަހުގެ ޖަލު ހުކުމެއް ކްރިމިނަލް ކޯޓުން ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

މި މައްސަލަ ޔާމީން އަދި ޔޫސުފް ނައީމްގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުން ކަނޑައަޅާފައިވާ އުޞޫލުތަކާ އެއްގޮތަށް ކްރިމިނަލް ކޯޓުގެ ނިންމުމާމެދު އަލުން ގޮތެއް ކަނޑައެޅުމަށްޓަކައި މައްސަލަ ކްރިމިނަލް ކޯޓަށް ތަޙުވީލު ކޮށްފައިވަނީ 18 އެޕްރީލް 2024 ދުވަހުއެވެ.

Advertisement

މިމައްސަލައިގައި މިއަދު ކުރިއަށް ގެންދިޔަ އަޑުއެހުމުގައި ޔާމީންގެ ވަކީލުން ވަނީ މީގެކުރިންވެސް އަޑުއެހުންތައް ލައިވްކޮށް ކުރިއަށްގެންދިޔަކަން ފާހަގަކޮށް މިފަހަރުގެ ޝަރީއަތްވެސް ލައިވްކޮށް ކުރިއަށް ގެންދިއުމަށް އެދިފައެވެ.

އެހެންކަމުން މައްސަލަ ބައްލަވާ ގާޒީ އަލީ ނަދީމް ނިންމެވީ ދެން އަންނަ އަޑުއެހުމަކުން ފެށިގެން ޝަރީއަތް ލައިވްކުރުމަށެވެ.

މިއަދުގެ އަޑުއެހުމުގައި ވަނީ ޝަރީއަތުގެ ކުރީގެ ހުށަހެޅުންތައް ހުށަހެޅުމަށް ދެ ފަރާތަކަށްވެސް އަންނަ ބުރާސްފަތި ދުވަހާ ހަމައަށް ފުރުސަތު ދެއްވާފައެވެ. އަދި މައްސަލައިގެ އިތުރު އަޑުއެހުމެއް އަންނަ މަހު ބާއްވާނެ ކަމަށްވެސް ވިދާޅުވިއެވެ.