އިނގިރޭސި ޕްރިމިއާ ލީގުގައި ވަގުތު ބްރައިޓަން އިން 2-1 އިން މެންޗެސްޓާ ޔުނައިޓެޑް ބަލިކޮށްފި އެވެ.

މިއީ ލީގުގައި މި ދެ ޓީމުން ވެސް ކުޅުނު ދެވަނަ މެޗު ކަމަށްވާއިރު، ފުރަތަމަ މެޗުގައި ބްރައިޓަން އިން ވަނީ ރަށުން ބޭރުގައި 3-0 އިން އެވަޓަން ބަލިކޮށްފަ އެވެ. ޔުނައިޓެޑުން ވަނީ ފުރަތަމަ މެޗުގައި އަމިއްލަ ދަނޑުގައި 1-0 އިން ފުލަމްގެ މައްޗަށް ކުރި ހޯދާފަ އެވެ.

ބްރައިޓަންގެ އެމެކްސް ސްޓޭޑިއަމްގައި ކުޅުނު މި މެޗުގެ 32 ވަނަ މިނެޓްގައި ޑެނީ ވެލްބަކް ވަނީ ބްރައިޓަން އަށް ލީޑު ނަގައިދީފަ އެވެ. ޔުނައިޓެޑަށް ކުރިން ކުޅުނު ވެލްބެކް މި ގޯލު ކާމިޔާބު ކުރީ ޔުނައިޓެޑްގެ އޭރިއާ ތެރެއަށް ހުރަސްކޮށްލި ބޯޅައެއް މުޅިން ހުހަށް ހުރެ ގޯލަށް ވައްދާލައިގެންނެވެ. މިއީ ވެލްބެކްގެ ކްލަބް ކެރިއަރުގައި ޖެހި 100 ވަނަ ގޯލެވެ.

Advertisement

ދެވަނަ ހާފު ފަށައިގެން ބްރައިޓަން އަށް ލީޑުފުޅާކޮށްދޭން ތަޖުރިބާކާރު މިޑްފީލްޑަރު، ޖޭމްސް މިލްނާ އަށް ރަނގަޅު ފުރުސަތެއް ލިބުނު ނަމަވެސް އޭނާ ފޮނުވާލި ބޯޅަ ރޮނގުމަތިން ސަލާމަތްކުރީ، ޔުނައިޓެޑްގެ ފުލްބެކް ޑިއޯގޯ ޑަލޯ އެވެ.

ޔުނައިޓެޑުން ނަތީޖާ އެއްވަރުކުރީ މެޗުގެ 60 ވަނަ މިނިޓްގައި އަމަދު ޑިއާލޯ ޖެހި ގޯލުންނެވެ. ބްރައިޓަންގެ އޭރިއާ ތެރެއަށް ވަދެ ޑިއާލޯ ފޮނުވާލި ހަމަލާ ގޯލަށް ވަނީ ބްރައިޓަންގެ ކުޅުންތެރިއަކު ފައިގައި ޖެހިފަ އެވެ.

ބްރައިޓަން މި މެޗުން މޮޅުވީ އިތުރު ވަގުތުގެ ފަސް ވަނަ މިނެޓްގައި ޖޮއާއޯ ޕެޑްރޯ ޖެހި ގޯލުންނެވެ. ޕެޑްރޯ މި ގޯލު ކާމިޔާބު ކުރީ ސިމޯން އަޑިންގްރާ ނަގައިދިން ހުރަހަކުން ބޮލުން ފޮނުވާލި ހަމަލާއަކުން ކަމަށްވާއިރު، އޭރިއާ ތެރޭގައި އޭނާ ހުރީ މުޅިން ހުހަށެވެ.

ލީގުގައި ޔުނައިޓެޑް ދެން ބައްދަލުކުރާނީ ލިވަޕޫލްއާ އެވެ. ބްރައިޓަން ނިކުންނާނީ އާސެނަލްއާ ދެކޮޅަށެވެ.