އިނގިރޭސި ޕްރިމިއާ ލީގުގައި ރޭ އެސްޓަންވިލާ 2-0 އިން ބަލިކޮށް، ލީގުގައި ކުޅުނު ދެވަނަ މެޗުން ވެސް އާސެނަލް މޮޅުވެއްޖެ އެވެ.

ލީގުގައި ކުޅުނު ފުރަތަމަ މެޗުން އާސެނަލް މޮޅުވީ އަމިއްލަ ދަނޑުގައި ވުލްވްސްއާ ބައްދަލުކޮށް 2-0 އިން މޮޅުވެފަ އެވެ. ފުރަތަމަ މެޗުގައި އެސްޓަން ވިލާ ވަނީ ރަށުން ބޭރުގައި 2-1 އިން ވެސްޓްހަމް ޔުނައިޓެޑް ބަލިކޮށްފަ އެވެ.

ވިލާގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މި ހާފުގައި ގޯލެއް ކާމިޔާބު ކުރަން އެންމެ ރަނގަޅު ފުރުސަތެއް ލިބުނީ ވިލާގެ ފޯވާޑް އޮލީ ވޮޓްކިންސް އެވެ. އާސެނަލްގެ އޭރިއާ ތެރޭ ހުހަށް ހުރެ ވޮޓްކިންސް ފޮނުވާލި ހަމަލާ ދިޔައީ ގޯލުގެ ދަނޑި ކައިރިން ބޭރަށެވެ.

Advertisement

މެޗުގެ ދެވަނަ ހާފްގެ ކުރީކޮޅު ވެސް ވޮޓްކިންސް އަށް ފުރުސަތެއް ލިބުނުއިރު، އޭނާ ބޮލުން ފޮނުވާލި ހަމަލާ މަތަކުރީ އާސެނަލްގެ ގޯލްކީޕަރު ޑޭވިޑް ރަޔާ އެވެ.

ވިލާ އަށް ގޯލު ޖަހަން ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާއަކަށްވީ މެޗުގެ 67 ވަނަ މިނެޓްގައި އާސެނަލުން ލީޑު ނެގުމެވެ. ބުކާޔޯ ސަކާ ތަނަވަސްކޮށްދިން ފުރުސަތަކުން މި ގޯލު އާސެނަލަށް ކާމިޔާބުކޮށްދިނީ ދެވަނަ ހާފުގައި ކުޅެން އެރި ލިއަންޑްރޯ ޓްރޮސާޑް އެވެ. އަދި މެޗުގެ 77 ވަނަ މިނެޓްގައި ތޯމަސް ޕާޓޭ ވަނީ އާސެނަލްގެ ދެވަނަ ގޯލު ކާމިޔާބުކޮށްދީ މި މެޗުން ތިން ޕޮއިންޓު އެޓީމަށް ކަށަވަރުކޮށްދީފަ އެވެ.

ލީގުގައި އާސެނަލް ދެން ބައްދަލުކުރާނީ ބްރައިޓަންއާ އެވެ. ވިލާ ނިކުންނާނީ ލެސްޓަ ސިޓީއާ ދެކޮޅަށެވެ.