އައްޑޫގައި ހުންނަ ޕޮލިސް ކޮލެޖަށް، ރާއްޖޭގައި ހުންނަވާ އިންޑިއާގެ ސަފީރު މުނޫ މަހާވަރު ޒިޔާރަތް ކުރައްވައި، މެނޭޖްމަންޓާ އެކީ މަޝްވަރާތަކެއް ބާއްވައިފި އެވެ.

ސަފީރުގެ މި ޒިޔާރަތުގައި ޕޮލިސް ކޮމިޝަނަރު އަލީ ޝުޖާއުގެ އިތުރުން ފުލުހުންގެ އެހެން ބައެއް އިސްވެރިންތަކެއް ވެސް ބައިވެރިވެވަޑައިގެންނެވި އެވެ.

ފުލުހުން ބުނީ ޕޮލިސް ކޮލެޖްގެ މެނޭޖްމަންޓާ އެކީ ބޭއްވި ބައްދަލުވުމުގައި އެތަނަށް ބޭނުންވާ އިތުރު އެހީތަކާއި އިތުރަށް ބޭނުންވާ ވަސީލަތްތަކާ ގުޅޭ ގޮތުން މަޝްވަރާތަކެއް ކުރެވުނު ކަމަށެވެ. ޕޮލިސް ކޮލެޖަކީ އިންޑިއާ ސަރުކާރުގެ ހިލޭ އެހީގެ ދަށުން ހިންގި މަޝްރޫއެކެވެ.

Advertisement

އެތަން ފުލުހުންގެ ބެލުމުގެ ދަށުން ހިންގަމުން އަންނަ އިރު، ފުލުހުންނަށް އެކި ދާއިރާތަކުން ޓްރެނިން ޕްރޮގްރާމްތައް އަންނަނީ ހިންގަމުންނެވެ.

އައްޑޫ ޕޮލިސް ކޮލެޖް، ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް (އެންސީޕޯލް) ގެ ނަމުގައި ހުޅުވީ މާޗް 27، 2022 ގަ އެވެ.