އިނގިރޭސި ޕްރިމިއާ ލީގުގައި އާސެނަލް އާއި ދެކޮޅަށް މިއަދު ބްރައިޓަން ކުޅުނު މެޗު 1-1 ގެ ނަތީޖާއަކުން އެއްވަރުކޮށް ޕްރިމިއާ ލީގުގެ ތާވަލުގެ އެއްވަނަ މަގާމު ވަގުތީގޮތުން ނަމަވެސް ހޯދައިފި އެވެ.

މި މެޗުގައި އާސެނަލް އިން ލީޑު ނަގާފައިވަނީ މެޗުގެ 38 ވަނަ މިނިޓްގައި ކައި ހަވާޓްޒް ކާމިޔާބުކޮށްދިން ލަނޑުންނެވެ.

މެޗުގެ އޮއެވަރު ބަދަލުވެގެން ގޮސްފައިވަނީ ދެވަނަ ހާފްގެ ކުޅުން ފެށުނުތާ ހަތަރުވަނަ މިނިޓްގައި އާސެނަލްގެ ޑެކްލަން ރައިސް އަށް ދެވަނަ ރީނދޫ ކާޑަކާއިއެކު ރަތް ކާޑެއް ދައްކާ ދަނޑުން ފޮނުވާލި ހިސާބުންނެވެ.

Advertisement

ބްރައިޓަން އިން މި މެޗު އެއްވަރުކޮށްފައިވަނީ މެޗުގެ 58 ވަނަ މިނިޓްގައި ޖޮއާއޯ ޕެޑްރޯ ކާމިޔާބު ކޮށްދިން ލަނޑުންނެވެ. މިއީ ލީގުގައި އޭނާ ޖެހި ދެވަނަ ލަނޑެވެ.

މި ނަތީޖާ އާއިއެކު ބްރައިޓަންއަށް ވަނީ ލީގުގައި މިހާތަނަށް ކުޅުނު ތިން މެޗުން ހަތް ޕޮއިންޓާއިއެކު ތާވަލުގެ އެއްވަނަ މަގާމު ވަގުތީ ގޮތުން ނަމަވެސް ލިބިފަ އެވެ.