ގައުމީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއި ގިނަ ފިރިހެނުން ސަލާމް ނުކުރުމުން އެކަމާ ދެރަވި ކަމަށް ކުރީ ރައީސް މައުމޫން އަބްދުލްޤައްޔޫމް ވިދާޅުވެއްޖެ އެވެ.

މައުމޫން "އެކްސް"ގައި ކުރެއްވި ޕޯސްޓެއްގައި ވިދާޅުވީ ޤައުމީ ދުވަހުގެ ރަސްމީ ޖަލްސާގައި ދިވެހި ވަންތަކަމަށްޓަކާ ފަޚުރުވެރިވާން ޖެހޭ ވަރަށް ގިނަ ކަންތައްތަކެއް ފެނުމުން ވަރަށް އުފާވި ކަމަށެވެ. ނަމަވެސް ވަރަށް ގިނަ ފިރިހެން ބޭފުޅުން ރައީސްގެ އަނބިކަނބަލުންނާ ސަލާމް ނުކުރެއްވިތަން ފެނުމުން ވަރަށް ދެރަވި ކަމަށް މައުމޫން ވިދާޅުވި އެވެ.

މައުމޫން ވަނީ ގައުމީ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ދެއްވި ހިތާބަށް ވެސް ތައުރީފު ކުރައްވާފަ އެވެ. އެގޮތުން އެ ހިތާބަކީ ވަރުގަދަ އަދި ހިތްގައިމު ވާހަކަތަކެއް ހިމެނޭ ހިތާބެއް ކަމަށް މައުމޫން ވިދާޅުވި އެވެ.

Advertisement

މައުމޫންގެ ބަސްފުޅުތަކަށް ރައީސް މުއިއްޒު ވަނީ ޝުކުރު އަދާކުރައްވާފަ އެވެ.

ކޮންމެ އަހަރެއްގެ ރަބީއުލް އައްވަލް މަހުގެ 1 ވަނަ ދުވަހު ރާއްޖޭގެ ގައުމީ ދުވަސް ފާހަގަކުރަނީ އައްސުލްތާން މުހައްމަދު ތަކުރުފާނުލް އައުޒަމް ޕޯޗްގީޒުންގެ އަތްދަށުން ހިރާއްޖެ ސަލާމަތްކުރެއްވި ޒިކުރާ އާކުރުމުގެ ގޮތުންނެވެ.