އިޒްރޭލު ޕާސްޕޯޓު މަނާ ކުރުމުގެ މަސައްކަތް ލަސްވި ކަމަށް ގަބޫލުނުކުރައްވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅި ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ އެތައް މަހެއް ވެފަ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޝަހީމް ވިދާޅުވީ އިޒްރޭލު ޕާސްޕޯޓު މަނާކުރުމުގެ މަސައްކަތަކީ މަޖިލީހާއި ގުޅުން ހުރި ކަމެއް ކަމަށާއި އެކަމާ ގުޅޭގޮތުން ވާހަކަ ދެއްކުން އެހާ މުނާސަބު ވާނެ ކަމަށް ނުދެކޭ ކަމަށެވެ. ނަމަވެސް އެ މަސައްކަތް ލަސްވެފައިވާ ކަމަށް ގަބޫލުނުކުރައްވާ ކަމަށް ޝަހީމް ވިދާޅުވި އެވެ.

Advertisement

"އެކަން ލަސްވެފައިވާ ކަމަކަށް އަޅުގަނޑު ގަބޫލެއް ނުކުރަން. އެއީ ރައްޔިތުންގެ މަޖިލީހުގައި އޮތް އިޖުރާއަތުގެ ތެރެއިން ރައްޔިތުންގެ މަޖިލީހަށް ހުށަހެޅޭ ކަންތައްތައް ކުރިއަށް ދާނީ، އެހެން ނޫންތޯ،" ޝަހީމް ވިދާޅުވި އެވެ.

މީގެކުރިން ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު ހީނާ ވަލީދު ވަނީ ރައްޔިތުންގެ މަޖިލީހުގެ ފުރަތަމަ ދައުރުގެ ޗުއްޓީއަށްފަހު އިޒްރޭލު ޕާސްޕޯޓުގެ މައްސަލަ ބާރަށް ކުރިއަށްދާނެ ކަމަށް ވިދާޅުވެފަ އެވެ.

އިޒްރޭލު މީހުންނާއި އެ ގައުމުގެ ޕާސްޕޯޓު އޮންނަ އެންމެންނަށް ރާއްޖެ ނާދެވޭ ގޮތަށް ގާނޫނަށް އިސްލާހު ގެންނަން ބިލެއް ހުށަހެޅުމުން ސަރުކާރުން ވަނީ ކޮމިޓީ މަރުހަލާގައި ބިލަށް އިސްލާހުތަކެއް ގެންނަން ނިންމާފަ އެވެ.

މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 40،000 އަށް ވުރެ މައްޗަށް އަރާފަ އެވެ.