ރައީސް ޑރ. މުހައްމަދު މުއިއްޒު ފައްޓަވައިދެއްވާފައިވާ '5 މިލިއަން ގަސް' ޕްރޮގްރާމުގެ ދަށުން ސްޓެލްކޯ އިން އދ. ފެންފުށީގައި 500 ގަސް އިންދައިފި އެވެ.

ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވަނީ މި މަސައްކަތަށް ފެންފުށީ ކައުންސިލާ އެ ރަށު ރައްޔިތުން ދިން އެއްބާރުލުން ފާހަގަކޮށް ޝުކުރު އަދާކޮށްފަ އެވެ.

ސްޓެލްކޯއިން އަންނަނީ 5 އަހަރުތެރޭގައި 5 ލައްކަ ގަސް އިންދުމުގެ ހަރަކާތެއް ކުރިއަށް ގެންދަމުންނެވެ. އެ ހަރަކާތުގެ ތެރެއިން މިހާތަނަށް 30،000 އަށް ވުރެ ގިނަ ގަސް ސްޓެލްކޯ އިން ވަނީ އިންދާފަ އެވެ.

ފަސް ލައްކަ ގަސް އިންދުމަށް ކުރިއަށް އޮތް ތަނުގައި ކޮންމެ މަހަކުވެސް ސްޓެލްކޯއިން ހިދުމަތްދޭ ރަށްރަށުގައި ގަސް އިންދުމުގެ ހަރަކާތް ކުރިއަށް ގެންދާނެ ކަމަށް އެކުންފުނިން މައުލޫމާތުދެ އެވެ.

މި ވެރިކަމުގެ ފަސް އަހަރުގެ ތެރޭގައި ފަސް މިލިއަން ގަސް އިންދެވުމުގެ ޕްރޮގްރާމެއް ހިންގަވާނެކަން ރައީސް އިއުލާންކުރެއްވީ މިދިޔަ އަހަރުގެ ޑިސެމްބަރުގައި ޔޫއޭއީގައި އޮތް "ކޮޕް28" ގަ އެވެ. ފަސް މިލިއަން ގަސް އިންދުމުގެ ޕްރޮގްރާމް މާލޭގެ އިތުރުން މުޅި ރާއްޖޭގައި ކުރިއަށް ގެންދާނެ އެވެ.