ރޭ އީރާނުން އިޒްރޭލްގެ އަސްކަރީ އަދި ސަލާމަތީ ތަންތަނަށް ދިން ވަރުގަދަ ބެލިސްޓިކް މިސައިލް ހަމަލާ ތަކުގެ ބަދަލު ހިފާނެ ކަމަށް ބުނެ އިޒްރޭލުން އިންޒާރު ދީފިއެވެ.

"އޮޕަރޭޝަން ޓްރޫ ޕްރޮމިސް 2" ގެ ނަން ދީފައިވާ އީރާނުގެ ހަމަލާތަކާ ގުޅިގެން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޓީވީ މެދުވެރިކޮށް ދެއްވި ބަޔާނެއްގައި ވިދާޅުވީ "އީރާނުން ހެދީ ބޮޑު ގޯހެއް ކަމަށާއި އެކަމުގެ އަގުދައްކާނެ" ކަމަށެވެ.

އިޒްރޭލަށް މަދަދުވެރިވާ އެމެރިކާ އާއި އިނގިރޭސިވިލާތާއި ފަރަންސޭސި ވިލާތުން އީރާނުގެ ހަމަލާ ވަގުތުން ވަނީ ކުށްވެރިކޮށްފައެވެ. އެމެރިކާގެ ރައީސް ޖޯ ބައިޑްންގެ މެސެޖުގައި"ފުރިހަމަ އަށް އިޒްރޭލަށް ތާއީދު ކުރާކަމަށް ވަނީ ވިދާޅުވެފައެވެ.

Advertisement

އައިއާރުޖީސީ އިން ބުނެފައިވަނީ 80 އިން ސައްތަ މިސައިލް ޓާގެޓަށް ވާސިލްވި ކަމަށެވެ. އައިއާރްޖީސީން ވަނީ މި ހަމަލާގެ ބަދަލު ހިފުމުގެ ގޮތުން އިޒްރޭލުން އީރާނަށް ހަމާލާއެއް ދީފިނަމަ އިޒްރޭލު "ފުނޑުފުނޑުކޮށްލާފަދަ" ހަމަލާއެއް ދޭނެކަމަށް ބުނެފައެވެ.