މަސްތުވާތަކެތީގެ ތެރޭގައި ހިމެނޭ އެންމެ ނުރައްކާތެރި އެއް ބާވަތް ކަމަށްވާ މެތަފެޓަމިން (މެތު) ރާއްޖޭގައި ބޭނުން ކުރުން އިތުރުވަމުންދާ ކަމަށް ފުލުހުން ބުނެފި އެވެ.

ދައުލަތުގެ މީޑިއާގައި ވާހަކަދައްކަމުން ސުޕްރިންޓެންޑެންޓް އޮފް ޕޮލިސް އަދި ޑްރަގު އެންފޯސްމަންޓް ޑިޕާޓްމަންޓުގެ ހެޑް، ނާހިދު ހުސެއިން ވިދާޅުވީ ދުނިޔޭގެ މާކެޓުގައި އުޅޭ ހުރިހާ ބާވަތެއްގެ މަސްތުވާތަކެތި ރާއްޖޭގައި ބޭނުން ކުރަމުންދާ ކަމަށާއި ނަމަވެސް މެތު ބޭނުން ކުރުން މަޑު މަޑުން މަތިވަމުންދާކަން ފާހަގަކުރެވިފައިވާ ކަމަށެވެ.

"އަޅުގަނޑުމެންނަށް ފާހަގަކުރެވެނީ މެތަފެޓަމިން މަޑު މަޑުން މައްޗަށް އެބަޖެހެއޭ ދެން ހުރި އެހެން މަސްތުވާތަކެތީގެ ބާވަތްތަކަށް ވުރެ. އެހެންވީމާ ޓްރެންޑް އެބަ ބަދަލުވޭ ވަރަށް ބޮޑަށް. ސިންތެޓިކް ދެން ޕާޓީ ޑްރަގްސް، މިއަށް ވަރަށް ބޮޑަށް ބަދަލުވަމުންދާކަން ފާހަގަކުރެވޭ،" ނާހިދު ވިދާޅުވި އެވެ.

Advertisement

ނާހިދު ވިދާޅުވީ ފާއިތުވި ފަސް އަހަރު ތަފާސް ހިސާބުތަކަށް ބަލާއިރު، މަސްތުވާތަކެތީގެ މައްސަލަތަކުގައި 8،000 އަށް ވުރެ ގިނަ މީހުން ހައްޔަރުކޮށްފައިވާ ކަމަށެވެ. މީގެތެރޭގައި ގިނައިން ހިމެނެނީ 25 އަހަރާއި 35 އަހަރާއި ދެމެދުގެ މީހުން ކަމަށާއި އަދި 18 އަހަރާއި 25 އަހަރާއި ދޭތެރޭގެ ވެސް މީހުން ކޮންމެވެސް ވަރަކަށް އުޅޭ ކަމަށް ނާހިދު ވިދާޅުވި އެވެ.

މި ސަރުކާރު ވެރިކަމާ ހަވާލުވި ދުވަހުން ފެށިގެން މިހާތަނަށް 328 މިލިއަން ރުފިޔާގެ މަސްތުވާތަކެތި ފުލުހުން ހޯދާފައިވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު އިއްޔެ ވަނީ ވިދާޅުވެފަ އެވެ.

މަސްތުވާތަކެތި ބޭނުންކުރާ މީހުންގެ ތެރެއިން ކުށްތަކަށް އަރައިގަންނަ މީހުން ބަންދުކުރަން ނެޝަނަލް ޑްރަގް އޭޖެންސީ އާއި ފުލުހުން ގުޅިގެން ހާއްސަ އޮޕަރޭޝަނެއް މިހާރު ވަނީ ފަށާފަ އެވެ. އެ އޮޕަރޭޝަނުގެ ތެރެއިން މި މަހުގެ 9 ވަނަ ދުވަހުން ފެށިގެން މިހާތަނަށް 14 މީހުން ޑްރަގް އޮފެންޑާސް ރިމާންޑް ސެންޓަރެއްގައި ވަނީ ބަންދުކޮށްފަ އެވެ.