ދުންފަތުގެ ގާނޫނަށް ގެނައި ބަދަލާ އެކު ހަދާ ގަވާއިދުތައް ހަދައި އަމަލު ފެށުމާ އެކީ ދެން ދުންފަތުގެ ވިޔަފާރި ކުރެވޭނީ އެކަމަށް ހާއްސަ ލައިސެންސެއް ނަގައިގެން ކަމަށް ހެލްތު މިނިސްޓްރީން ބުނެފި އެވެ.

ދުންފަތުގެ ގާނޫނަށް ގެނައި އިސްލާހަށް އަމަލު ކުރަން ފަށާފައި ވަނީ މިދިޔަ ހުކުރު ދުވަހު އެވެ. އެ ގާނޫނުގެ ދަށުން މި މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. އަދި އަންނަ މަހު 15 އެކަމާ ހިލާފުވެއްޖެ ނަމަ ބޮޑެތި ޖޫރިމަނާ އަދަދުތަކުން ޖޫރިމަނާ ވެސް ކުރެވޭނެ އެވެ.

ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭނެ؛ އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ

Advertisement

ހެލްތު މިނިސްޓްރީން އިއްޔެ އާންމުކުރި އިއުލާނެއްގައި ބުނީ ގާނޫނަށް އަމަލު ކުރަން ފެށުމާ އެކު ދުންފަތުގެ ބާވަތްތައް ރާއްޖެއަށް އެތެރެކުރާ އަދި ރާއްޖޭން ބޭރުކުރާ ކޮންމެ ފަރާތަކާއި ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ރާއްޖޭގައި ވިއްކާ ކޮންމެ ފަރާތެއްގެ ކިބައިގައި ސަރުކާރުގެ ކަމާ ބެހޭ އިދަރާތަކުން ދޫކުރާ ސައްހަ ލައިސެންސެއް އޮންނަން ވާނެ ކަމަށެވެ.

އެ ލައިސެންސް ހޯދަން ލާޒިމް ވާނީ ގާނޫނުގައި ބަޔާންކޮށްފައިވާ ފަދައިން އެ ހުއްދަތައް ދިނުމުގެ އުސޫލާއި އިޖުރާއަތްތައް ކަނޑައަޅާ ބަޔާންކުރާ ގަވާއިދު އާންމުކުރުމުން އެ އެ ގަވާއިދުގައި ކަނޑައަޅާ މުއްދަތެއްގައި ކަމަށް ވެސް މިނިސްޓްރީން ބުންޏެވެ.

ލައިސެންސް ދޫކުރުމަށް އެ ގާނޫނަށް އަމަލުކުރަން ފަށާތާ 60 ދުވަހުގެ ތެރޭގައި ވަކި ގަވައިދެއް ހަދަން ޖެހެ އެވެ.

ދުންފަތުގެ ގާނޫނަށް ގެނައި މި ފަހަރު ގެނައޮ އަނެއް ބޮޑު ބަދަލަކީ ދުންފަތުގެ ބާވަތްތައް ވިއްކޭނެ އެންމެ ހަގު އުމުރު 21 އަހަރަށް މަތިކުރުމެވެ. ކުރިން ކަނޑައަޅާފައި އޮތީ 18 އަހަރެވެ.

ދުންފަތާ ދެޅަށް ގެނައި އިސްލާހުތަކުގެ ތެރޭގައި މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު ވެސް އެޅޭނެ އެވެ.