'ދިވެހި ޔޫތު ލީގު 2024' މުބާރާތް ފަށައިފި އެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަ މޭޓްސް (އެމްއެސްއެމް) ގުޅިގެން ބާއްވާ 12 އަހަރުން ދަށާއި، 14 އަހަރުން ދަށާއި، 16 އަހަރުން ދަށުގެ އުމުރުފުރާ އަށް ހުޅުވާލައިގެން ބާއްވާ ޔޫތު ލީގުގައި ކޮންމެ އުމުރުފުރެއްގެ ޖުމްލަ 8 ޓީމު ވާދަކުރެ އެވެ.

މި މުބާރާތް ކުރިއަށް ގެންދަނީ ހެންވޭރު ދަނޑާއި، ހުޅުމާލެ ސްޓޭޑިއަމްގެ އިތުރުން އަދި ގަލޮޅު ދަނޑުގައެވެ.

Advertisement

އިއްޔެ ފެށި މުބާރާތް ކުރިއަށްދާނީ އަންނަ އަހަރުގެ ޖެނުއަރީ މަހުގެ 1 އަ ހަމައަށެވެ.

މި މުބާރާތް ހުޅުވި މެޗްގައި އިއްޔެ މެޗުގައި 12 އަހަރުން ދަށުގެ ކެޓަގަރީގައި, ޓީސީ ސްޕޯޓްސް ކުލަބު ނުކުތީ ޔުނައިޓެޑް ވިކްޓަރީ (ޔޫވީ) އާ ދެކޮޅަށެވެ. އެ މެޗު ޓީސީން ކާމިޔާބުކުރީ 7-0 ގެ ނަތީޖާއަކުންނެވެ. އަދި 14 އަހަރުން ދަށުގެ ކެޓަގަރީގައި ޓީސީން ޔޫވީގެ މައްޗަށް ކުރި ހޯދީ 6-0 ގެ ނަތީޖާއަކުންނެވެ.

މީގެ އިތުރުން ރޭ ކުޅުނު 12 އަހަރުން ދަށުގެ ކެޓަގަރީގެ މެޗުގައި ކުލަބު ވެލެންސިއާ އަތުން ވިކްޓަރީ ސްޕޯޓްސް ކުލަބު މޮޅުވީ 2-0 ގެ ނަތީޖާއަކުންނެވެ. އަދި ރޭ ކުޅުނު ފަހު މެޗުގައި 14 އަހަރުން ދަށުގައި ވިކްޓަރީން ވަނީ ވެލެންސިއާގެ މައްޗަށް 5-1 ގެ ނަތީޖާއަކުން ކުރި ހޯދައިފަ އެވެ.

މި މުބާރާތުގައި ވާދަކުރާ ޓީމްތަކަކީ ޔޫވީ އާއި، ޓީސީ އާއި، ވެލެންސިއާ އާއި، ވިކްޓަރީ އާއި، ކުލަބު އީގަލްސް އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ސުޕަ ޔުނައިޓެޑް ސްޕޯޓްސް (ސަސް) އަދި ހުއްރިއްޔާ ސްޕޯޓްސް ކުލަބެވެ.