ސްޓެލްކޯއިން 50،000 އަށް ވުރެ ގިނަ ގަސް އިންދައިފި
ފަސް އަހަރުތެރޭ ސްޓެލްކޯ އިން 500،000 ގަސް އިންދުމަށް ކުރަމުންދާ މަސައްކަތުގެ ތެރެއިން މިހާތަނަށް 50،000 އަށް ވުރެ ގިނަ ގަސް އިންދައިފި އެވެ.
ސްޓެލްކޯ އިން ބުނީ ސަރުކާރުގެ 5 އަހަރުން 5 މިލިއަން ގަސް ޕްރޮގްރާމްގައި ބައިވެރިވުމުގެ ގޮތުން، ފަސް އަހަރުން 500،000 ގަސް އިންދުމަށް ސްޓެލްކޯއިން ފަށާފައިވާ ޙަރަކާތުގައި، މި އަހަރުގެ ޖޫން މަހުގެ 5 ވަނަ ދުވަހުން ފެށިގެން ޑިސެމްބަރު މަހުގެ 21 ވަނަ ދުވަހުގެ ނިޔަލަށް ސްޓެލްކޯއިން ޚިދުމަތްދޭ ރަށްރަށުގައި ޖުމްލަ 52،334 ގަސް އިންދާފައިވާ ކަމަށެވެ.
މި ޕްރޮގްރާމާ ގުޅޭގޮތުން ސްޓެލްކޯގެ މެނޭޖިންގް ޑިރެކްޓަރ ހުސައިން ފަހުމީ ވިދާޅުވީ ކޮންމެ މަހަކު އެކުންފުނިން އެވްރެޖްކޮށް 8،340 ގަސް އިންދަމުންދާ ކަމަށެވެ. އަދި ފަސް އަހަރުގެ ތެރޭގައި 500،000 ގަސް އިންދުމަށް ގިނަ މަސައްކަތަކެއް ކުރަމުން އަންނަ ކަމަށް ވިދާޅުވިއެެވެ.
ފަސް މިލިއަން ގަސް އިންދުމުގެ ޕްރޮގްރާމަކީ ދައުރު ނިމުމުގެ ކުރިން ރާއްޖޭގައި ފަސް މިލިއަން ގަސް އިންދުމަށް ރައީސް ޑރ. މުޙައްމަދު މުޢިއްޒު އިފްތިތާހު ކުރެއްވި ޕްރޮގްރާމެކެވެ. ޑރ. މުޙައްމަދު މުޢިއްޒު މި ޕްރޮގްރާމު އިފުތިތާހުކޮށްދެއްވީ ދުނިޔޭގެ ތިމާވެށީގެ ދުވަސްކަމަށްވާ ޖޫން 5 ގައެވެ.
ސްޓެލްކޯއިން ހިދުމަތްދޭ ރަށްރަށުގައި 50،000 ގަސް އިންދުމުގެ ހަރަކާތްތައް ކުރަމުން އަންނައިރު، މި ޕްރޮގްރާމްގެ ދަށުން މާލޭގެ އިތުރުން މުޅި ރާއްޖޭގައި ގަސް އިންދުމުގެ ހަރަކާތް ކުރިއަށް ގެންދާނެ އެވެ.