ރޭގެ ވަގުތެއްގައި ހުޅުމާލޭ އެކި ހިސާބުތަކުން ކަރަންޓު ކެނޑިފައިވަނީ ހައި-ވޯލްޓޭޖް ކެބަލަކަށް ގެއްލުންވުމުގެ ސަބަބުންކަމަށް ސްޓެލްކޯއިން ވިދާޅުވެއްޖެއެވެ.

ހުޅުމާލޭ ފޭސް 1 އަދި 2 ގެ ބައެއް ސަރަޙައްދުތަކުން ކަރަންޓު އަދި ފެން ކެންޑުމުގެ މައްސަލަތަކެއް ރޭގެ އެކި ވަގުތުތަކުގައިވަނީ ކުރިމަތިވެފައެވެ.

ހުޅުމާލޭގެ ފޭސް 1 އަދި ފޭސް 2 ގެ ހިޔާ ޓަވަރުތައް ހިމެނޭ ސަރަޙައްދުން ކަރަންޓު ކެނޑުމާއި ގުޅިގެން ސްޓެލްކޯއިންވަނީ ކަރަންޓުގެ ޚިދުމަތް އަލުން ދިނުމުގެ މަސައްކަތްކޮށްފައެވެ.

Advertisement

ސްޓެލްކޯއިން ވިދާޅުވީ، ކަރަންޓު ކެނޑިފައިވަނީ ފީޑަރަކަށް ދިމާވި މައްސަލައަކުންކަމަށެވެ. އަދި މިމައްސަލަ ދިމާވި ކަރަންޓު ފޯރުކޮށްދޭ ހައި-ވޯލްޓޭޖް ކޭބަލަކަށް ގެއްލުންވުމާއި ގުޅިގެންކަމަށެވެ. ސްޓެލްކޯގެ މަސައްކަތުން ވަގުތީގޮތުން ކޭބަލްގެ މައްސަލަ ހައްލުކޮށް ރޭވަނީ ކަރަންޓު ފޯރުކޮށްދޭން ފާށާފައެވެ.

ކޭބަލަށް ގެއްލުންވެފައިވަނީ ކޮން ސަރަޙައްދަކުންތޯ ބެލުމަށް ކުރިއަށްގެންދިޔަ މަސައްކަތުން ކަރަންޓު ކެނޑެން މެދުވެރިވީ، ފަހި ދިރިއުޅުން ފްލެޓު މަޝްރޫޢުގެ ތެރެއިން ކުރިއަށްދިޔަ މަސައްކަތެއްކުރުމަށް ކޮނުމުގެ ތެރޭގައި، ހައި-ވޯލްޓޭޖް ކޭބަލަށް ލިބުނު ގެއްލުމަކާއި ގުޅިގެންކަމަށް ސްޓެލްކޯއިންވަނީ ވިދާޅުވެފައެވެ.