ރަމަޟާންމަހާއި މިއަހަރުގެ ހޫނުމޫސުމާ ދިމާވާތީވެ މާލެ ސަރަހައްދުގެ ކަރަންޓް ކެޕޭސިޓީ އިތުރުކުރުމުގެ މަސައްކަތް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ފަށައިފިއެވެ.

ކުރިއަށްއޮތީ ހޫނުގަދަ ދުވަސްވަރެއްކަމުން ރޯދަމަހާއި އެދުވަސްތަކާ ދިމާވާތީވެ، ކަރަންޓް ބޭނުންކުރާ މިންވަރު އިތުރުވާނޭކަމަށް ސްޓެލްކޯއިން ވަނީ ލަފާކޮށްފައެވެ. އެގޮތުން ގޭބިސީތަކުން ކަރަންޓް އިތުރަށް ބޭނުންކުރާނޭ ވަރު ބަލައި މިހާރުގެ ކަރަންޓް ކެޕޭސިޓީއަށް 17 މެގަވޮޓް އިތުރުކުރުމަށް ސްޓެލްކޯއިން ވަނީ ނިންމާފައެވެ.

ސްޓެލްކޯގެ މެނޭޖިންގް ޑިރެކްޓަރު ހުސެއިން ފަހުމީ ވިދާޅުވީ މިކަމަށް ބޭނުންވާ ޓްރާންސްފޯމަރާއި، އިންޖީނާއި ކޭބަލް މިހާރު އެ ކުންފުންޏަށް ލިބިފައިވާކަމަށާއި، ކުރިއަށްއޮތް 8 ވަރަކަށް ދުވަހުގެ ތެރޭގައި އިންޖީނުތައް އިންސްޓޯލްކޮށް ޚިދުމަތްދޭން ފެށޭނެކަމަށެވެ.

Advertisement

ފަހުމީ ވިދާޅުވީ ރަމަޟާން މަހު ގޭބީސީތަކުން ކަރަންޓް ބޭނުންކުރާ މިންވަރު އިތުރުވަމުން އަންނަ ކަމަށާއި، މިދިޔަ އަހަރުގެ ރަމަޟާން މަހު ޕީކްގައި 114 މެގަވޯޓަށް ކަރަންޓް ބޭނުންކޮށްފައިވާ ކަމަށެވެ. އަދި މި އަހަރު އެ ކުންފުނިން އަންދާޒާކުރަނީ ޕީކް ގަޑިތަކުގައި 132 މެގަވޯޓަށް ކަރަންޓް ބޭނުންކުރާ މިންވަރު އަރައިގެންދާނެ ކަމަށެވެ.

ފަހުމީ ވަނީ މިފަހަރުގެ ރަމަޟާންމަހު ކަރަންޓް ބޭނުންކުރާ މިންވަރު އިތުރުވުމާ ގުޅިގެން ކަރަންޓް ކަނޑަން ނުޖެހޭނޭކަމުގެ ޔަގީންކަންދެއްވާފައެވެ.