މާލެ ސަރަހައްދުގައި އިއްޔެ ކަރަންޓު ބޭނުންކުރި ނިސްބަތް އިތުރުވެފައިވާ ކަމަށް ސްޓެލްކޯ އިން މިއަދު ބުނެފި އެވެ.

އެކްސްގައި ކުރި ޕޯސްޓެއްގައި ސްޓެލްކޯ އިން ބުނީ ރޯދަ މަހުގެ ދެވަނަ ދުވަހު މާލެއާއި، ހުޅުމާލޭގައި ކަރަންޓު ބޭނުން ކުރި މިންވަރު ފުރަތަމަ ދުވަހާ އަޅާ ބަލާއިރު އިތުރުވެފައިވާ ކަމަށެވެ.

އެގޮތުން އިއްޔެ އެންމެ ޕީކްގަޑީގައި 80 މެގަވޮޓްގެ ކަރަންޓް ބޭނުންކޮށްފައިވާ ކަމަށް ސްޓެލްކޯ އިން ބުނެ އެވެ.

Advertisement

ސްޓެލްކޯއިން އާންމުކުރި ޗާޓުން ދައްކާ ގޮތުގައި އިއްޔެ އެންމެ ގިނައިން ކަރަންޓު ބޭނުންކޮށްފައިވަނީ ހަވީރު 16:00 އާއި 18:00 ގަ އެވެ. އެ ގަޑިތަކުގައި އެވަރެޖުކޮށް ބޭނުންކޮށްފައިވަނީ 79 މެގަވޮޓުގެ ކަރަންޓެވެ.

ކަރަންޓު ކަނޑަން ނުޖެހޭ ވަރަށް ސްޓެލްކޯ އިން ރޯދައަށް ތައްޔާރުވެފައިވާއިރު، މިއަހަރުގެ ރޯދަ މަހުގެ ކަރަންޓު ބިލުން ވެސް 10 ޕަސެންޓުގެ ޑިސްކައުންޓެއް ދޭން ސަރުކާރުން ވަނީ ނިންމައިފަ އެވެ.