އެފްއޭއެމް ވެޓެރަންސް ލީގު 2025 ގެ ގްރޫޕް ބީގައި ދަ ގްރާންޑޭ ސްޕޯޓްސް ކުލަބް 4-2 ގެ ނަތީޖާއަކުން ބަލިކޮށް، ގްރޫޕުގެ ބީގެ އެއްވަނައަށް ސްޓެލްކޯ ރެކްރިއޭޝަން ކުލަބު އަރައިފައެވެ.

މާފަންނު ޓާފް ދަނޑުގައި ކުޅުނު މި މެޗުގެ ފުރަތަމަ ހާފުގައި ދަ ގްރާންޑޭއިން ކުރިއަށް ދިޔައީ ހަފީޒް ޖެހި ލަނޑުންނެވެ. ނަމަވެސް ފުރަތަމަ ހާފު ނިމުމުގެ ކުރިން އަހުމަދު ޝިޔާން މުހައްމަދު އާދަމް ވަނީ ސްޓެލްކޯއަށް ހަމަހަމަ ކޮށްދީފައެވެ.ދެވަނަ ހާފުގައި ސްޓެލްކޯގެ ކުޅުން ރަނގަޅުކޮށް، މުހައްމަދު ވަހީދު ޖެހި ލަނޑުން ސްޓެލްކޯ ފުރަތަމަ ފަހަރަށް ލީޑުނެގުމަށްފަހު، އިއްޒަތު އަބްދުލް ބާރީ ވަނީ ވިދިވިދިގެން ދެ ލަނޑު ޖަހައި ސްޓެލްކޯގެ ލީޑު އިތުރަށް ފުޅާކޮށްދީފައެވެ. މެޗުގެ ފަހު ވަގުތުތަކުގައި ދަ ގްރާންޑޭއަށް ލިބުނު ޕެނަލްޓީއަކުން ހަފީޒް އިތުރު ލަނޑެއް ޖެހި ނަމަވެސް، މެޗު ނިމުނީ ސްޓެލްކޯގެ މޮޅުވެގެންނެވެ.

މި މޮޅާއެކު ސްޓެލްކޯ ވަނީ ކުޅުނު ތިން މެޗުން 6 ޕޮއިންޓް ހޯދައި ގްރޫޕް ބީގެ އެއްވަނައަށް އަރައިފައެވެ. މުއިވެޔޮ ފްރެންޑްސް އާއި ދަ ގްރާންޑޭ ވަނީ ދެ މެޗުން 4 ޕޮއިންޓް ހޯދައި، އެއް ޕޮއިންޓް އަދަދަކުން ދެވަނަ އަދި ތިންވަނައިގައެވެ. ޕޮލިސް 3 ޕޮއިންޓާއެކު ހަތަރުވަނައިގައި އޮތްއިރު، އީގަލްސްއަށް މިހާތަނަށް އެއްވެސް ޕޮއިންޓެއް ނުލިބެއެވެ.

Advertisement