ޕްރޮސެކިއުޓާރ ޖެނެރަލް (ޕީޖީ) އޮފީހުން ކުށުގެ ރެކޯޑު ސާފުކުރުމަށް ވަގުތީ ގޮތުން ބަދަލުތަކެއް ގެނެސްފިއެވެ.

ޕީޖީ އޮފީނުން ވިދާޅުވީ، އެ އޮފީހުގެ ކުށުގެ ރެކޯޑު ސާފުކުރުމަށް އެދި، އޮންލައިންކޮށް ހުށަހަޅާ މައްސަލަތަކުގައި ޢާންމުގޮތެއްގައި އެއް ދުވަހުގެ ތެރޭގައި ރެކޯޑު ސާފުކޮށްދޭ ކަމަށެވެ. އެހެން ނަމަވެސް، ސަރުކާރު ޙިއްސާވާ ކުންފުންޏެއްގެ ހުރިހާ މުވައްޒަފުންގެ ކުށުގެ ރެކޯޑު ސާފުކުރުމަށް އެދި ހުށަހެޅުމުން، މިނިޒާމު މވަގުތު ތޮއްޖެހިފައިވާ ކަމަށާއި، މިކަމުގެ ސަބަބުން މިއޮފީހުން ފޯރުކޮށްދޭ އެހެން ޚިދުމަތްތަކަށްވެސް ބުރޫ އެރި ކަމަށް ޕީޖީން ވިދާޅުވިއެވެ.

ޕީޖީން ވިދާޅުވީ، ޢާންމު ގޮތެއްގައި އަހަރަކު، ޕީޖީ އޮފީހުން ކުށުގެ ރެކޯޑު ސާފުކޮށްދެނީ ޖުމްލަ 13 ހާހެއްހައި ފޯމު ކަމަށެވެ.

Advertisement

އެގޮތުން އިއްޔެ އެކަނި އެއޮފީހަށް 3930 ފޯމު ލިބުނުއިރު، އެއީ ގާތްގަނޑަކަށް އަހަރަކު އަންނަނާނެކަމަށް އަންދާޒާކުރާ ފޯމުގެ %30 ޕަސެންޓު ފޯމު ކަމަށާއި އޭގެ ތެރެއިން 3419 ފޯމުގެ ރެކޯޑު ސާފުކޮށްދެވިފައިވާ ކަމަށް ޕީޖީން ވަނީ ބުނެފައެވެ. ނަމަވެސް، އެއީ، ރޭގަނޑާއި ހަމައަށް މަސައްކަތް ކޮށްގެންނެވެ.

"މިއީ ދެމެހެއްޓެނިވި ކަމަކަށް ނުވާތީ، މިދުވަސްކޮޅު ރެކޯޑު ސާފުކޮށްދިނުން ހިނގާނީ ރަސްމީ މަސައްކަތު ވަގުތަގައި އެކަނިކަމުގައި ހަމަޖައްސައިފީމެވެ. ކޮންމެ ދުވަހަކުވެސް ރަސްމީ ވަގުތު ނިމެންދެން އެދުވަހަކަށް ސާފުކޮށްދެވުނު ވަރަކަށް ސާފުކޮށްދޭނަމެވެ. އެއަށްފަހު ޖެހިގެން އަންނަ ދުވަހު އަނެއްކާވެސް ފަށާނީއެވެ." ޕީޖީން ވިދާޅުވިއެވެ.

ޕީޖީން އިތުރަށް ވިދާޅުވީ، މިހާރު އޮތް ފޯމުތައް ކުޑައަޑިވުމުން، ކުރިންވެސް ޚިދުމަތް ދެމުން ގެންދިޔަގޮތަށް ދުވަހުން ދުވަހަށް ފޯމުތައް ސާފުކޮށްދެމުން ދާނެ ކަމަށެވެ.