އދ. ދިގުރަށުގައި ވިހެއުމަށްފަހު އެއްލާލާފައި އޮއްވާ ފެނުނު ކުއްޖާގެ ހަށިގަނޑު މާލެ ގެނެސްފިއެވެ.

އެރަށު ކައުންސިލުން މައުލޫމާތުދިން ގޮތުގައި އެކުއްޖާ އާ ހަވާލުވުމަށްފަހު ފުލުހުން ވަނީ އެކުއްޖާގެ ހަށިގަނޑު މާލެ ގެންގޮސްފައެވެ.

މައުލޫމާތު އެނގޭ މީހަކު ބުނިގޮތުގައި އެ ކުއްޖާގެ ހަށިގަނޑު މާލެ ގެނެސްފައި ވަނީ ރޭ 9:00 ހާއިރުއެވެ. އަދި ކުއްޖާގެ ހަަށިގަނޑު މިހާރު އޮތީ ގަލޮޅު މޯޗަރީގައެވެ.

Advertisement

އިއްޔެ ހެނދުނު ދިގުރަށު ކުނިގޮނޑަށް އުކާލަން ގެންދިޔަ ކުނީގެ ތެރޭގައި ކަޅުކޮތަޅަކަށް ލާފައި އެއްލާލާފައި އޮއްވާ ފެނުނީ އަންހެންކުއްޖެކެވެ.

ކައުންސިލުން މައުލޫމާތުދިން ގޮތުގައި އެކުއްޖާ ފެނުނީ އެރަށު ގެސްޓު ހައުސަކުން ނެރުނު ކުނި ކޮތަޅެއްގެ ތެރެއިންނެވެ. އެހެންނަނަމަވެސް އެއްވެސް އަނިޔާގެ ނިޝާނެއް ހަށިގަނޑުގައި ފެންނާކަށް ނެތް ނަމަވެސް އެ ކުއްޖާ މަރާލީ ނޭވާ ހާސްކޮށްގެން ކަމުގެ އަޑުތައް ރަށުތެރޭ ވަނީ ފެތުރިފައެވެ. އަދި އެ އަންހެންމީހާ އަކީ ގަޔަށް ދޫކޮށް އޮންނަ ހެދުންލާ މީހެއް ކަމުން ބަނޑު ބޮޑުކަމެއް ގެސްޓު ހައުސްގެ މީހުންނަށްވެސް ނޭނގޭ ކަމަށް އެރަށު މީހުން ވަނީ ބުނެފައެވެ.

ރަށު މީހުން ބުނާގޮތުން އެއްލާލާފައި އޮއްވާ ފެނުނު ކުއްޖާއަކީ ސިއްޚަތު ރަނގަޅަށް އޮތް ބޮޑު ކުއްޖެކެވެ. ބަރުދަނުގައި 3.5 ކިލޯ ހުންނާނެ ކަމަށް ލަފާކުރެވޭ ކަމަށް ރަށު މީހުން ބުނެއެވެ.

ކުއްޖާ ބެލިި ޑޮކްޓަރު ބުނާގޮތުން ނަމަ ކުއްޖާ އެއްލާލީ ވިހެއިތާ އެއްގަޑިއިރު ނުވަނީސްއެވެ.

ވިހެއި އެ ކުއްޖާ އެއްލާލި މައްސަލައިގައި އެރަށު ގެސްޓު ހައުސްގައި މަސައްކަތްކުރާ އުމުރުން 30 އަހަރުގެ ލަންކާގެ އަންހެނަކު ވަނީ ހައްޔަރުކޮށްފައެވެ. އަދި އަންހެން މީހާ ވަނީ ޝަރީއަތް ނިމެންދެން ބަންދުކޮށްފައެވެ.