ޕްރޮސެކިއުޓަރ ޖެނެރަލް (ޕީޖީ) އޮފީހުގެ ވަކީލު އަހުމަދު ޝަފީއު އަށް ފިޔަވަޅު އެޅުމަށް ގޮވާލައި ރައްޔިތުންގެ މަޖިލިހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓާ) ކުއްލި މައްސަލައެއް ހުށަހަލުއްވައިފިއެވެ.

މަޖިލީހުގެ މިއަދުގެ ޖަލްސާގައި ނަޝީދު ވިދާޅުވީ މީސްމީޑީއާގައި ދައުރުވަމުންދާ ވީޑީޔޯއިން ފެނިގެންދަނީ އާންމު މިންގަނޑާއި ހިލާފު ވީޑިއޯއެއް ކަމަށާއި ޝަފީއުއާ މެދުގައި ފިޔަވަޅު އަޅަން ޖެހޭނެ ކަމަށެވެ. އަދި އިސްލާމް ދީނާއި ރާއްޖޭގެ އާންމު މިންގަނޑާ ހިލާފު މަންޒަރުތައް ފެންނަ ވީޑިއޯއެއް ދައުރުވަމުންދާތީ، ޝަރީއަތުން ކަނޑައަޅާފައިވާ އަދަބު ވީޑިއޯއިން ފެންނަ ފަރާތްތަކަށް ދިނުމަށް ނަޝީދު ވަނީ ގޮވާލައްވައިފިއެވެ.

"މި ފަދަ ކުށްތައް ސާބިތުވި މީހުންނަށް ލުއި އަދަބުތައް ދިނީ ކީއްވެގެން ކަން މިހާރު ސާފު ވާނެ،" ކުއްލި މައްސަލައަށް ވާހަކަދައްކަވަމުން ނަޝީދު ވިދާޅުވި އެވެ.

Advertisement

މި ކުއްލި މައްސަލަ މަޖިލިހަށް ބަލައިގަތީ 18 މެމްބަރުންގެ ވޯޓުންނެވެ.

މި މައްސަލައިގައި ޝަފީއު މީގެކުރިން ވިދާޅުވީ އެއީ ބަޔަކު އޭނަ ބަދުނާމް ކުރުމުގެ ގޮތުން އޭނަގެ ފޮޓޯއެއް ބޭނުންކޮށްގެން ހަދާފައިވާ ވީޑިޔޯއެއް ކަމަށާއި ބަޔަކު އޭނަ އާއި އޭނަގެ ރަހުމަތްތެރިޔާ ރަހީނުކޮށް ފޯނުވެސް ފޭރިގަތް ކަމަށެވެ.

ޕީޖީ އޮފީހުގެ ވަކީލަކު އެއްޖިންސުން ގުޅުން ހިންގި ކަމަށް ތުހުމަތުކުރެވޭ މައްސަލައެއް ފުލުހުންވެސް ދަނީ ބަލަމުންނެވެ.