ޓައިވާން ވަށައިގެން ޗައިނާގެ ހަނގުރާމަ މަތިންދާބޯޓުތަކާއި ހަނގުރާމަ މަނަވަރުތައް ދަތުރުކުރާ ކަމަށް ރިޕޯޓްކޮށްފިއެވެ.

ޗައިނާގެ އަމިއްލަ ސަރަހައްދެއްގެ ގޮތުގައި ދެކެމުންދާ ޓައިވާނަކީ ޑިމޮކްރެޓިކް އުސޫލުން ވެރިކަންކުރާ ޤައުމެކެވެ. ވޭތުވެދިޔަ ހަތަރު އަހަރު ތެރޭގައި މިސަރަހައްދުގައި ގަވާއިދުން ޗައިނާގެ އަސްކަރިއްޔާގެ ޕެޓްރޯލްތަކާއި ޑްރިލްތައް ހިންގާކަމުގެ ޝަކުވާތަށް ވަނީ އިތުރުވެފައެވެ.

ޓައިވާންގައި އަންނަ ޖެނުއަރީ 13 ވަނަ ދުވަހު ބާއްވާ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބަށް ކެމްޕެއިން ކުރުމުގެ މަސައްކަތް ކުރިއަށް އެބަދެއެވެ.

Advertisement

ޓައިވާންގެ ޑިފެންސް މިނިސްޓްރީން ބުނީ ހޮނިހިރު ދުވަހު ޓައިވާންގެ އުތުރާއި މެދުތެރެ އަދި ހުޅަނގު ދެކުނުގެ ވައިގެ ސަރަހައްދުން ޖޭ-10، ޖޭ-11 އަދި ޖޭ-16 ހަނގުރާމަ މަތީ މަތިންދާބޯޓުތައް ފެނިފައިވާ ކަމަށެވެ.

ޗައިނާއިން ފަހަކަށް އައިސް ޓައިވާން ކައިރީގައި ހިންގާ އަސްކަރީ ހަރަކާތްތަކާ ބެހޭ ގޮތުން އެއްވެސް އެއްޗެއް ބުނެފައެއް ނުވެ އެވެ. އެގޮތުން މީގެ ކުރިން ޗައިނާއިން ސިފަކޮށްފައި ވަނީ އެއީ ޓައިވާންގެ ވަކިވެގަތުމަށް މަސައްކަތްކުރާ ފަރާތްތަކާއި އެމެރިކާއާ ދެމެދު އޮންނަ ސިއްރު ގުޅުން ހުއްޓުވުމާއި، ޗައިނާގެ ސަރަހައްދީ އެއްބައިވަންތަކަން ހިމާޔަތްކުރުމުގެ މަގުސަދުގައި ކަމަށެވެ.

ޗައިނާއާ އެކު މަޝްވަރާ ކުރުމަށް ތަކުރާރުކޮށް ހުށަހަޅާފައިވާ ޓައިވާންގެ ސަރުކާރުން ބުނަނީ ޗައިނާއިން ކުރާ އިސްތިގުލާލުގެ ދައުވާތަކާ ދެކޮޅު ހަދައި، އެމީހުންގެ މުސްތަގުބަލު ކަނޑައަޅާނީ ހަމައެކަނި އެ ޤައުމުގެ ރައްޔިތުން ކަމަށްށެވެ.

ވަކިވެގަތުމަށް މަސައްކަތްކުރާ މީހެއްގެ ގޮތުގައި ޗައިނާއިން ކުށްވެރިކޮށްފައިވާ ވެރިކަންކުރާ ޑިމޮކްރެޓިކް ޕްރޮގްރެސިވް ޕާޓީގެ ލައި ޗިންގް ޓެ އަކީ ޓައިވާންގެ ދެން ރައީސަކަށް ވުމަށް އެންމެ ކުރީގައި އޮތް ފަރާތެއް ކަމަށް ޚިޔާލު ހޯދުމުގެ ވޯޓުތަކުން ދައްކަ އެވެ.

ޗައިނާއާއި ގާތް ގުޅުމެއް އޮންނަ ޓައިވާންގެ މައި އިދިކޮޅު ޕާޓީ ކުއޮމިންޓަންގުން، އިންތިހާބު ކާމިޔާބު ވެއްޖެ ނަމަ ޗައިނާއާ އެކު މަޝްވަރާތައް ހުޅުވާލުމަށް ވަނީ ވައުދުވެފަ އެވެ. އެކަމަކު އެޕާޓީން ވެސް ބުނަނީ އެމީހުންގެ މުސްތަގުބަލު ނިންމާނީ ހަމައެކަނި ޓައިވާންގެ ރައްޔިތުން ކަމަށެވެ.