އީރާނުން ފޮނުވާލި ޑްރޯން ހަމަލާއެއް އިންޑިއާ ކަނޑުގައި އޮތް ބޯޓެއްގައި ޖެހިފައިވާ ކަމަށް އެމެރިކާގެ ޑިފެންސް ޑިޕާޓްމަންޓުން ބުނެފި އެވެ.

"ލައިބީރިއާގެ ދިދަ ޖަހާފައިވާ، ޗެމް ޕްލޫޓޯ ނަމަކަށް ކިޔާ މިބޯޓަށް އަމާޒުވި ހަމަލާއަކީ އީރާނުން ފޮނުވާލި، އެއް ދިމާލަކަށް ހަމަލާދޭ ޑްރޯންއަކުން ދިން ހަމަލާއެއްކަމަށް" ޕެންޓަގަންގެ ތަރުޖަމާނަކު ވިދާޅުވި އެވެ.

ޕެންޓަގަންގެ ބަޔާނުގައި ބުނެފައިވަނީ މިއީ "2021 ވަނަ އަހަރަށް ފަހު ވިޔަފާރި ބޯޓުފަހަރަށް އީރާނުން ދިން ހަތް ވަނަ ހަމަލާ" ކަމަށެވެ.

Advertisement

މިހަމަލާގެ ސަބަބުން އެއްވެސް މީހަކަށް ގެއްލުމެއް ލިބިފައިނުވާއިރު ބޯޓުގައި ރޯވި ކުޑަ އަލިފާންގަނޑު ވަނީ ނިއްވާލާފައެވެ. މި ހާދިސާ ހިނގާފައިވަނީ އިންޑިއާގެ އައްސޭރިފަށާ އެންމެ 200 ނޯޓިކަލް މޭލު ދުރުގައެވެ.