ގެދޮރުވެރިޔާ މަޝްރޫއުގެ ދަށުން ފްލެޓްތައް ލިބިފައިތިބި ފަރާތްތަކަށް ފްލެޓްތައް ހަވާލުކުރުމުގެ މަސައްކަތް ފަށާނެ ކަމަށް ހައުސިން މިނިސްޓްރީ ބުނެފިއެވެ.

މިދިޔަ ސަރުކާރުން ފަށައި، އާންމުންނާ ހަވާލުކުރި ގެދޮރުވެރިޔާ ފްލެޓް މަޝްރޫއުގެ ފުރަތަމަ 4،000 ފްލެޓްތައް ހަވާލުކުރުމުގެ މަސައްކަތް ހުއްޓުމަށް އެންޓި ކޮރަޕްޝަން ކޮމިޝަން (އޭސީސީ)އިން އެންގީ މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހުގެ ރޭއެވެ.

އެދުވަހުން ފެށިގެން، ގެދޮރުވެރިޔާގެ މަޝްރޫއުގެ މައްސަލަތަކެއް ބަލަމުންދާކަމަށް އޭސީސީން ބުނަމުންދާއިރު، އެ މައްސަލައިގައި ކޮޅެއް ނުފެނި ދިގުލައިގެން ދާތީ ޢާންމުންގެ ފަރާތުން ބައެއް މީހުން ވަނީ އޭސީސީ އަދި ހައުސިން މިނިސްޓްރީގެ ދޮށަށް އެއްވާން ފަށައިފައެވެ.

Advertisement

އެގޮތުން ދެތިން ދުވަހަކު އެ އާންމުން އޭސީސީ އަދި ހައުސިންއަށް ގޮސް، އެ މައްސަލައިގެ އަަދާހަމައެއް ހޯދާފައިވާއިރު، އެކަމުގައި ހައުސިން އިން ބުނަމުން ދިޔައީ އެ މައްސަލަ އޭސީސީން ބަލަމުން ދިޔަ ކަމަށެވެ. އެއާއެކު، މިފަހުން އެ މައްސަލަ ހޫނުވީ، ގޯއްޗާއި ފްލެޓު ލިބުނު ފަރާތްތަކަށް މި ހަފުތާގައި ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގ މިނިސްޓްރީން ކުރިއަށްގެންދަވާނެކަމަށް ރައީސް ޑރ. މުޙައްމަދު މުއިއްޒު ވިދާޅުވެ ކުރެއްވި ޓްވީޓަކާ ގުޅިގެންނެވެ.

ގެދޮރުވެރިޔާ އަދި ބިންވެރިޔާ މަޝްރޫއާ ގުޅޭ ގޮތުން ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވީ ގޯއްޗާއި ފްލެޓު ލިބޭނެ ކަމަށް ފައިނަލް ލިސްޓުގައި ހިމެނި އަދި ގެޒެޓުކޮށްފައިވާ ފަރާތްތަކަށް ރަޖިސްޓްރީ ހަދައިދީ އެތަންތަން ހަވާލުކުރުމަށް ވެވަޑައިގެންނެވި ވަޢުދުފުޅާ އެއްގޮތަށް ހަވާލު ކުރައްވާނެ ކަމަށެވެ. އެ މަސައްކަތް މި ހަފުތާގެ ތެރޭގައި ނިންމަވާނެ ކަމަށް ރައީސް މުއިއްޒު ވިދާޅުވިއެވެ.