މެންޗެސްޓާ ޔުނައިޓެޑްގައި ފެންވަރު ރަނގަޅު ކުޅުމެއް ނުދެއްކުނު އިނގިރޭސި ފޯވާޑް ޖޭޑަން ސަންޗޯ ލޯނު އުސޫލުން ކުރީގެ ކްލަބް ބޮރޫޝިއާ ޑޯޓްމަންޑަށް ބަދަލުވެއްޖެ އެވެ.

ސަންޗޯ އެޓީމަށް ބަދަލުވީ މި ސީޒަނުގެ ނިޔަލަށެވެ. ސަންޗޯގެ ސޮއި 2021 ވަނަ އަހަރު ޔުނައިޓެޑުން ބޮޑު އަގުގައި ހޯދީ ޑޯޓްމަންޑުގައި މޮޅު ކުޅުމެއް ދެއްކުމުންނެވެ. އެކަމަކު 23 އަހަރުގެ ފޯވާޑް ޔުނައިޓެޑަށް ބަދަލުވުމަށް ފަހު ޑޯޓްމަންޑުގެ މޮޅު ކުޅުން ތަކުރާރެއް ނުކުރެވުނެވެ.

ސަންޗޯ އަށް މި ސީޒަނުގައި ޔުނައިޓެޑްގެ ޓީމުން ވެސް ފުރުސަތެއް ނުލިބެ އެވެ. އޭނާ ޔުނައިޓެޑަށް މެޗެއް އެންމެފަހުން ކުޅުނީ މިދިޔަ އަހަރުގެ އޮގަސްޓް މަހު އެވެ. ފަހުން އެޓީމުގެ ކޯޗު އެރިކް ޓެން ހާގާ މައްސަލަޖެހި ޓީމުން ބާކީކުރީ އެވެ. އެ މައްސަލައިގައި ސަންޗޯ މާފަށް ނޭދުމުން ޔުނައިޓެޑުން ސަންޗޯ ޓީމުގައި ހިމަނަން ބޭނުމެއްނުވި އެވެ.

Advertisement

ކްލަބް ފޯމު ދަށްވުމާ އެކު ސަންޗޯ އަށް 2022 ވަނަ އަހަރު ގަތަރުގައި އޮތް ވޯލްޑް ކަޕްގައި އިންގްލެންޑް ޓީމުން ވެސް ފުރުސަތެއް ނުލިބުނެވެ.

ޓްރާންސްފާ އަށް ފަހު ސަންޗޯ ބުނީ ޑޯޓްމަންޑަށް ދެވުމުން ކުރެވެނީ އަނބުރާ ގެއަށް އާދެވުމުގެ އިހުސާސް ކަމަށެވެ. ސަންޗޯ މިފަހަރު ޑޯޓްމަންޑުގައި ބޭނުންކުރާނީ 10 ނަންބަރު ޖާޒީ އެވެ. ކުރިން އެ ކްލަބުގައި ސަންޗޯ ބޭނުންކުރީ ހަތް ނަންބަރު ޖާޒީ އެވެ.

ސަންޗޯ ޑޯޓްމަންޑަށް ބަދަލުވިއިރު ބަޔާން މިއުނިކުން ވަނީ ޓޮޓެންހަމް ހޮޓްސްޕާގެ ޑިފެންޑަރު އެރިކް ޑަޔާ ލޯނު އުސޫލުން އެ ކްލަބަށް ގެނެސްފަ އެވެ. ޑަޔާ ލޯނު އުސޫލުން ބަދަލުވީ ސީޒަނުގެ ބާކީ ބަޔަށެވެ.