މިއަހަރު ހައްޖު ކޯޕަރޭޝަންގެ ހަވާލުގައި ހައްޖަށްދާ ހައްޖާޖީންގެ ލައިވް ލޮކޭޝަން ބެލޭނެ ޓްރެކިން ޑިވައިސްއެއް ދިނުމަށް ހަމަޖެހިފައިވާކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

1445 ވަނަ އަހަރުގެ ޙައްޖުގެ އަޅުކަމަށް މޯލްޑިވްސް ޙައްޖު ކޯޕަރޭޝަނުން ވަމުންދާ ތައްޔާރީތަކާ ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން ހައްޖު ކޯޕަރޭޝަންގެ އެމްޑީ ޝަކީލް ވިދާޅުވީ، މިއަހަރު އެ ކޯޕަރޭޝަންގެ ހަވާލުގައި ހައްޖަށްދާ ހައްޖާޖީންނަށް ޓްރެކިން ޑިވައިސެއް ހަވާލުކުރާނެ ކަމަށެވެ.

އެގޮތުން ހައްޖާޖީއަކު މަގުއޮޅުންފަދަ ކަމެއް މެދުވެރިވެއްޖެނަމަ ޓްރެކިން ޑިވައިސްއަށް ފިތާލައިގެން އެމީހަކު ގެއްލިފައިވާކަން އެންގޭނެ ކަމަށް ޝަކީލް ވިދާޅުވިއެވެ. އަދިޓްރެކިން ޑިވައިސްގެ އެހީގައި ހައްޖާޖީން ތިބޭ ތަން ވަގުތުން ދެނެގަނެވޭނެ ކަމަށްވެސް ވިދާޅުވިއެވެ.

Advertisement

ޝަކީލް ވިދާޅުވީ ލައިވް ލޮކޭޝަން ބެލޭނެ ޓްރެކިން ޑިވައިސްއަކީ ރައްކާތެރިކަމުގެ ގޮތުން އެޅޭ ފިޔަވަޅެއް ކަމަށެވެ.

ރާއްޖެއަށް މިއަހަރު ހައްޖަށް މީހުން ގެންދިއުމަށް ލިބިފައިވަނި 1000 ކޯޓާއެވެ. މި ހުރިހާ ކޯޓާއެއްވެސް ދީފައިވަނީ ހައްޖު ކޯޕަރޭޝަނަށެވެ. އިތުރު ހައްޖު ކޯޓާ ހޯދުމަށް މަސައްކަތް ކުރަމުންދާކަން ސަރުކާރުން މީގެކުރިން ހާމަކޮށްފައިވެއެވެ.