ޖަޕާނުގެ އޮންލައިން ވެބްސައިޓް "ފުޑް ޓްރިޕް"ގައި ދިވެހިރާއްޖޭގައި އުފައްދާ ކާބޯތަކެތީގެ ބާވަތްތައް މާކެޓްކުރުމުގެ ފުރުސަތު ހުޅުވާލައިފިއެވެ.

"ފުޑް ޓްރިޕް"އަކީ ޖަޕާނުގެ ކުންފުންޏެއްކަމަށްވާ އޮޓާނީ ޓްރޭޑިންގެ ލިމިޑެޓްގެ ވެބްސައިޓެކެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވީ، "ފުޑް ޓްރިޕް" ވެބްސައިޓްގައި ދިވެހިރާއްޖޭގެ އުފެއްދުންތައް ދައްކާލުމުގެ ފުރުޞަތު ރާއްޖެއަށް ލިބިފައިވާކަމަށެވެ. އެގޮތުން "ފުޑް ޓްރިޕް" ބީޓުބީ ޕްލެޓްފޯމުގައި، އެއްވެސް ފީއަކާއި ނުލައި ދިވެހި އުފެއްދުންތައް މާކެޓްކުރުމުގެ ފުރުސަތު 31 މާރިޗު 2025 ގެ ނިޔަލަށް ލިބިފައިވާކަމަށް އެ ވުޒާރާއިން ވިދާޅުވެއެވެ.

Advertisement

އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވީ "ފުޑް ޓްރިޕް"ގައި ކާބޯތަކެތީގެ އުފެއްދުންތައް މާކެޓްކުރަން ބޭނުންވާ ފަރާތްތަކަށް އެ ފުރުސަތު މިހާރު ހުޅުވާލާފައިވާކަމަށެވެ. އަދި މިއީ ދިވެހި އުފެއްދުންތައް ޖަޕާނު ބާޒާރުގައި މާކެޓްކުރުމަށް ލިބޭ ރަނގަޅު ފުރުޞަތެއްކަމަށްވެސް އެ ވުޒާރާއިން ފާހަގަކުރައްވައެވެ.

މި ކަމަށް ޝައުގުވެރިވާ ފަރާތްތަކުން، ޕުޑް ޓްރިޕްގެ ޕްލެޓްފޯރމް (https://www.food-trip.jp) މެދުވެރިކޮށް، ރެޖިސްޓްރީވުމަށް އެ ވުޒާރާއިން އެދިވަޑައިގަންނަވައެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވީ، ގައިޑްލައިންއަށް ފެތޭ ހުރިހާ ވިޔަފާރިތަކަށްވެސް މާކެޓްކުރުމުގެ ފުރުސަތު ލިބިގެންދާނެކަމަށެވެ. ފުޑް ޓްރިޕްއަކީ ކާބޯތަކެތީގެ ވިޔަފާރިތަކާބެހޭ މައުލޫމާތު ފޯރުކޮށްދޭ ޖަޕާނުގެ އޮންލައިން ޕްލެޓްފޯމްއެކެވެ. އަދި މިއީ ޖަޕާނުގައި ކާބޯތަކެތި ގަތުމަށް މަޝްހޫރު ވެބްސައިޓެއްކަންވެސް ފާހަގަކޮށްލެއެވެ.