މާލޭގައި ސައިކަލެއްގައި ދިޔަ މީހަކަށް ތޫނު އެއްޗަކުން ހަމަލާދިންކަމުގެ ތުހުމަތުގައި ދެ މީހަކު ހައްޔަރުކޮށްފި އެވެ.

ފުލުހުން ބުނީ މި މަހުގެ 15 ވަނަ ދުވަހުގެ ހެނދުނު 8:17 ހާއިރު ރަތްވިލާ މަގުން ދުއްވާފައިދިޔަ ސައިކަލެއްގައި އިން މީހަކަށް ބަޔަކު ތޫނު އެއްޗަކުން ހަމަލާދީ ޒަހަމްކޮށްލާފައިވާ މައްސަލައެއް ފުލުހުންގެ ގޭންގް ކްރައިމް އިންވެސްޓިގޭޝަނުން ތަހުގީގު ކުރަމުންދާ ކަމަށެވެ.

މި މައްސަލައިގައި ހައްޔަރުކޮށްފައިވަނީ ހ. ރޯޒެންޑޭލް އުމުރުން 29 އަހަރުގެ ޞަފްވާން ޒުފްރަތާއި ށ. ފޭދޫ، އުދަރެސް، އުމުރުން 34 އަހަރުގެ ޢަލީ ނާޝިދު އެވެ.

Advertisement

ފުލުހުން ބުނީ ސަފްވާން ހައްޔަރުކޮށްފައިވަނީ މި މަހުގެ 20ވަނަ ދުވަހުގެރޭ 21:19 ހާއިރު ކަމަށާއި ޢަލީ ނާޝިދު ހައްޔަރުކޮށްފައިވަނީ 21ވަނަ ދުވަހު 1:09ހާއިރު ކަމަށެވެ.

މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ ދެ މީހުންގެ ބަންދަށް ފަސް ދުވަސް ޖަހައިފަ އެވެ.