މިއަހަރު ރާއްޖެއަށް އައި ފުރަތަމަ ކުރޫޒްލައިނުގައި ގިނަ އަދަދެއްގެ އިންޑިއާގެ ފަތުރުވެރިން ޒިޔާރަތްކޮށްފިއެވެ.

އިޓަލީވިލާތުގެ މިކްރޫޒްލައިން މާލެއަށް ބަނދަރު ކޮށްފައިވަނީ މިއަދުގެ ހެނދުނުގެ ވަގުތެއްގައެވެ. މި ކްރޫސްލައިނާގައި 3500 އެއްހާ ފަތުރުވެރިން ވަނީ ދަތުރުކޮށްފައެވެ. މި ކްރޫޒްލައިނާ ރާއްޖެއައިސްފައިވަނީ އިންޑިއާގެ މުމްބާއީ އަދި ގޯއާ ފަދަ ސަރަޙައްދުތަކުގައި ބަނދަރު ކުރުމަށްފަހުގައެވެ.

 މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް، މާޔާއިން ބުނީ، މި ކްރޫޒްލައިނާގައި ރާއްޖެއަށް ޒިޔާރަތްކުރި ގިނަ އަދަދެއްގެ ފަތުރުވެރިން މާލެއަށާއި މާލެ ކައިރީ ރަށްރަށަށް ފައިބައިފައިވާކަމަށެވެ.

Advertisement

މާޔާއިން ބުނީ މިއަހަރުގެ މޭމަހާއި ހަމައަށް 14 ކްރޫޒްލައިނާއެއް ރާއްޖެއަށް ދަތުރު ކުރުމަށް ހަމަޖެހިފައިވާކަމުގައެވެ. އެގޮތުން މިމަހުގެ ތެރޭގައި ބ. އަތޮޅަށާއި މާލެ ސިޓީއަށް 2 ކްރޫޒްލައިނާއެއް ދަތުރު ކުރުމަށް ހަމަޖެހިފައިވާކަމަށްވެސް މާޔާއިން މަޢުލޫމާތުދީފައިވެއެވެ.

ފަތުރުވެރިކަމުގެ ޕީކް ސީޒަނާއާ ދިމާކޮށް ރާއްޖެއަށް، ކްރޫޒްލައިނާތަކުންނާއި އެނޫންވެސް ގޮތްގޮތުން އަންނަ ފަތުރުވެރިން ގިނަކަން ފާހަގަކޮށްލަން ޖެހެއެވެ. ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން ރާއްޖެއަށް މިހާރު އެންމެ ގިނަ ފަތުރުވެރިން އަންނަނީ ރަޝިއާއިންނެވެ. 2 ވަނައިގައި އިންޑިއާ އުޅޭއިރު 3 ވަނައިގައި އުޅެނީ ޗައިނާއެވެ.